الحبل السري
-
سيف .. أنا تعبانة
· سلامتك يا حبيبتي ألف سلامة عليكي .. أنا بدالك .. مالك فيكي ايه
-
ممكن تسمعني ؟
· أنا لو عليا مش عايز اسمع غيرك
-
من غير زعل .. أرجوك
· أزعل منك انتي؟ .. أنا والله ما اقدر .. أنا بحبك أكثر من نفسي .. ولو اقدر
أخبيكي بين ضلوعي
-
بالظاااابط .. هي دي المشكلة
· مشكلة؟ .. اني بحبك أكثر من نفسي .. دي مشكلة؟
-
لأ .. انك تخبيني بين ضلوعك
· أنااا ... أنا مش فاهم حاجة
-
اوعدني متزعلش
· اوعدك
-
بص يا حبيبي .. أنا بحبك زي ما بتحبني ..
وروحي فيك .. بس انا وانت جزء من عالم .. الناس فيه عبارة عن دواير .. بتتقابل مع
بعضها ساعات وبيكون فيه جزء مشترك .. من غير ده ما يفسد خصوصية كل دايرة منهم
· يعني ايه
-
يعني مينفعش عشان بتحبني تعزلني عن الدنيا
واللي فيها
· ما انا كمان معزول عن الدنيا واللي فيها .. ومكتفي بيكي .. ومش عايز غيرك
-
غلط .. غلط .. احنا شخصين يا سيف مش شخص واحد
· بس بس .. ايه اللي بتقوليه ده
-
أرجوك اسمعني بقا .. انا بموت
· بعد الشر عنك .. أنا فداكي
-
الموت مبيفاديش روح بروح .. لأن كل روح منهم
ملك للي خلقها .. روحي مش فيك ولا روحك فيا
· متقوليش كده .. أنا روحي فيكي
-
افهم بقا .. ده كلام رومانسي حلو .. جميل ..
لكن مش حقيقي .. احنا زي اثنين قفلوا على نفسهم وقرروا يربطوا بين بعض بحبل سري ..
لو حد فينا حب يكون نفسه .. يود أهله .. أصحابه .. حبايبه .. الثاني بيلف حوالين
رقبته ويمنعه
· أنا مكتفي بيكي
-
مش صح .. فين أهلك؟ .. صحابك؟ .. كيانك؟
· انتي كل دول
-
أرجوك .. قبل ما اوصل لمرحلة .. ممكن تقضي
عليك وعليا .. ثق فيا .. حبك عندي زي العبادة فرض .. بس انا إنسانة .. ومحتاجة
للناس .. كل الناس حواليا
· انتي كل الناس
-
لأ .. لأ .. أرجوك .. أنا في دايرة خنقاني ..
اسمع كلامي قبل ما .. اسيبك
· تسيبيني؟ .. معلش انا بس سرحت شوية .. سمعت غلط .. حقك عليا .. أنا عارف
انك متقدريش تقولي كده .. صح؟
-
أنا آسفة .. بس انا مش هقدر أكمل على كده
· يعني ايه ؟ ايه اللي حصل عشان كل ده .. عشان بحبك وبخاف عليكي؟
-
خاف عليا .. لكن وانت واثق فيا
· واثق فيكي .. بس مبثقش في الدنيا والناس والمجتمع
-
لا دي مش ثقة .. أنا مبقولكش سيبلي الحبل ع
الغارب .. لكن اديني مساحة .. أزور أهلي .. اقعد مع اصحابي .. أكون أنا
· انتي أنا
-
أنا مش انت .. ولا انت أنا .. ربنا مخلقناش
كده
· أنا بحبك
- ............
· انتي مردتيش .. أنا .. أنا قلت أنا بحبك
-
أنا زهقت
·
(يمسك كتفيها ويهزها
كالذي يهز النخلة لتساقط عليه رطبا جنيا): بقول لك أنا بحبك .. ردي عليا
-
لما تسمعني
· بقول لك بحبك .. ردي عليا (يخنقها)
-
انت بتخنقني
· ردي عليا
-
فك رقبتي
· أنا بحبك
-
أنا بموت
· أنا بحبك
-
سيب إيدك شوية
· أنا بحبك .. بحبك .. بحبك
- (تسقط ميتة)
· ردي عليا .. ردي عليا .. قومي .. انتي مبترديش عشان نايمه؟ .. أنا آسف ..
بس اصحي ردي عليا وقولي لي بحبك ومش عايزه غيرك .. قلبي هيخرج من ضلوعي .. ردي
بقاااا .. أنا أنا اااااه (يسقط ميتا)